立法會旗下有三部車，車牌「LC1」嘅係主席座駕，上個禮拜啱啱換咗新車；「LC3」就係七人車，主要負責接送立法會秘書處職員出去開會或搞活動時用；「LC2」就係立法會秘書長嘅用車，依家用緊嘅係萬事得房車。秘書長Pauline吳文華前排決定「犧牲小我」，建議行政管理委員會換車時將「LC2」由房車轉做八人車。佢話見依家立法會好多職員都要出去做嘢，得「LC3」一部車接送實在唔夠用，如果佢部車轉咗八人車，就算多啲職員要出去做嘢，大家都方便啲。
Pauline係工作狂，就算食飯時間都係行去立法會附近食晏或買飯盒，佢部車絕對係「開工不足」，所以今次嘅決定都算好明智，但就犧牲咗秘書長嘅派頭。唔知今後嘅秘書長會唔會唔肯過佢呢？
呢次選車都好「獨特」，似乎冇人願意安分守己，乖乖哋去換番部正正經經同見得人嘅房車。就以立法會主席為例，佢嘅座駕「LC1」以前係部寶馬房車，依家就換咗部凌志GS450h油電燃跑房車。