辭咗職嘅立法會議員「長毛」梁國雄，尋日忽然喺運輸署搞嘅自訂車牌拍賣會現身，原來佢早幾個月申請嘅「CYUSH0」車牌都有份公開拍賣，但佢到場時已經畀人以底價五千蚊買咗。
究竟呢個車牌有乜意思呢？長毛叫大家試吓將S同HO讀快啲，就會得出一個好不雅嘅英文詞彙，中文可以譯做渾蛋。至於佢想鬧邊個渾蛋其實都唔難估，因為係人都知行政會議召集人梁振英叫「CY」，不過長毛仲要賣關子，叫大家照佢嘅解說讀一次個車牌就自然心領神會喎。
除咗「CYUSH0」外，長毛同時申請咗「D0NALD PK」車牌，但運輸署尋日就冇一齊推出拍賣。長毛話諗出呢兩個車牌其實係為小市民出番啖氣，因為近年社會上有太多唔公道嘅事，佢咁做只係道出市民嘅心聲，仲揚言呢類惡搞車牌會陸續有嚟。咁運輸署審批時要打醒十二分精神至得喇！