新創建尋日搞員工同樂日，董事總經理鄭家純三仔鄭志明都有出席。平日較少公開露面嘅鄭志明話，佢一個月裏面差唔多有一半時間留喺內地處理家族生意，但返港就一定會約班朋友踢波同睇波，仲爆自己以前好鍾意玩閃避球添！
鄭志明話自己係英超勁旅阿仙奴嘅頭號粉絲，但要睇情況先知可唔可以飛去英國觀戰，可以嘅話一定會去。
鄭志明年紀輕輕已經幫手打理家族喺內地嘅唔少業務，當中包括污水處理嘅項目。咁會唔會覺得呢類工作有啲厭惡性呢？佢好得體咁話為咗家族生意，佢一定會全力以赴，仲話相信做多啲呢類環保工業，對集團嘅形象有幫助喎。
佢大哥鄭志剛早已拉埋天窗，咁幾時到佢呀？一聽到咁問，佢即刻面都紅晒咁話，依家仲未有女友，呢啲嘢都係遲啲先講喎！