話說港台早前搞咗個名為「傳媒初體驗」嘅活動，邀請一班中小學生就濫藥、校園暴力同援交文化等議題進行報道，並喺尋日舉行頒獎禮。社民連主席陶君行上台就毒品問題進行分享時，就話相信食毒品嘅後生仔其實都係想試吓「越軌」嘅滋味，仲話如果佢哋想「越軌」，不如加入社民連喎，事關佢哋最鍾意「越軌」。

幫社民連選情倒米

將社民連比喻為毒品後，阿陶再下一城，當住八百名中小學生話：「奧巴馬同克林頓等前美國總統細個都試過食可卡因，不過試吓就好喇，『可一，不可再』嘛！」

老實講，阿陶口出狂言擺明係博出位，借題發揮兼幫自己個黨賣廣告啫！但此話一出，嚇到台下嘅師生家長即刻Ｏ晒嘴兼滴晒汗，坐喺第一排嘅正生書院校長陳兆焯即刻忍唔住大叫：「一次都唔好啦！唔好玩啦！」

有同為頒獎嘉賓嘅立法會議員上台時，不忘同台下嘅學生講，阿陶之前只係「講笑」，仲寸爆咁話：「好似校園暴力咁，唔通我打完你之後，又話我只係試吓，叫你唔好當真咩！」而工聯會議員王國興亦加入圍剿阿陶嘅行列，舉晒手起晒弶咁強調，一定係「不可一，不可再」，仲抽晒水咁話自己一定會幫手跟進財政預算案提到嗰三十億禁毒基金。

事後有人幫阿陶解圍，話佢只係想講，錯咗一次都仲有翻身嘅機會啫。喺臨近補選呢啲咁敏感嘅時刻，阿陶仲講埋啲咁嘅嘢，如果佢打算將「可一，不可再」納入政綱嘅話，相信一定嚇死班家長，要佢哋投票畀咁「越軌」嘅社民連就真係難上加難嘞！