小白觀點:出去走一轉好彩冇打亂種

記唔記得有隻叫「奀豬」嘅警犬呀？呢，畀一聲春雷嚇到佢逃出警署嗰隻呢，好彩後尾大話夾好彩搵得番。不過當時小白老弟已經事先警告，呢個社會咁險惡，好多狗公虎視眈眈等住啲無知狗女撞埋去，出去走一轉，一定有手尾跟。話口未完，依家奀豬女生咗成竇狗仔，不過大家可以放心，狗仔全部都同阿奀豬媽好似樣，冇一隻係瑪蓮萊頭斑點狗身嘅雜種。

聽警方講，呢次嘅經手人係同種優生嘅狗同袍，而且喺出事前已經打咗種，奀豬因為懷咗狗BB而性情有變，先至會發生出走事件。本欄認為，走狗事件可一不可再，為免再影響警隊聲譽，當局最好下令警犬唔可以再發生辦公室戀情。至於發情嘅雄狗狗又點算呢？易啦，分配一個翠玉瓜畀佢，又或者喺狗房長播「志X飯局」囉。

Blog:http://sunsiupak.blogspot.com

阿豪觀點:警犬待遇佳勝人類打工仔

警犬「奀豬」點解離家出走終於真相大白！原來佢出走時已珠胎暗結，當時係想出去搵一個天然狗竇，用嚟保護就出生嘅仔女。

唔講唔知，原來警犬嘅待遇真係好好，奀豬生呢一胎一雄七雌八隻狗仔，原來係參加警犬隊推行嘅警犬配種繁殖計劃嘅結果。亦即係話，做一隻警犬唔單止包食包住，仲包埋談戀愛同結婚生仔添。聽聞奀豬生嘅幼犬都會被訓練做警犬，咁即係連你後代都照顧埋。你睇吓人類打工仔吖，依家仲要為爭取最低工資而努力，兼畀啲商界人士喝住，話一個鐘唔好多過二十蚊，否則會削弱香港競爭力，你話係咪淒涼嘞？

唯一令人心理比較平衡嘅係，原來香港地唔單止人類要做冇殼蝸牛，連個狗竇原來都一樣咁難搵，咁都未完全至於人不如狗嘅。

Blog:http://lukchiho.blogspot.com

網友觀點

狒狒：奀豬單嘢反映出警隊對懷孕警犬嘅照顧唔夠周全。

四眼仔：可能奀豬想用出走嚟爭取一個五星級嘅竇！

八哥：呢間走狗嘅警署真係還得神落，唔使孭鑊仲送多幾隻！

寵物店員：奀豬流浪期間一定吃盡苦頭！回家真好的確冇講錯。