呢三個位於油尖區嘅車位，一九九一年地契期滿，由於業主無向政府申請續契，所以九五年起，三個車位轉由政府代管，即係話，地政總署有權將車位出租或者轉售。但奇怪嘅係，署方居然一直無做轉契手續，呢三個車位就咁做咗十五年「無主孤魂」。不過咁，雖然無主，但前業主仍然繼續將車位出租，照交管理費，直到○八年大廈翻新，業主立案法團翻查土地註冊處資料，先發現三個車位原來係無主物業。

正如律師話齋，續契手續其實好簡單，涉及嘅費用亦唔多，有業主唔續地契，放棄業權，已經係一大奇聞，更加離奇嘅係政府竟然連送上門嘅業權都唔收。直至本報跟進之下，地政總署先話搞緊轉契手續喎。叮，遲唔遲啲吖！

開講有話，由一滴水可以睇穿成個世界，政府咁烏龍，全港都唔知仲有幾多個類似嘅無主物業。講到呢度，太一叮忽然諗到近期全城關注嘅危樓問題。係人都知，好多舊樓日久失修，都係因為政府闊佬懶理，部分舊樓甚至連業主立案法團都冇，小業主根本無力負擔維修費用。

對於呢個問題，當局唔見棺材唔流淚，早前土瓜灣發生冧樓慘劇，屋宇署至急急腳巡查全港四千幢樓齡五十年以上嘅舊樓，上月底，驗樓行動終於完成，發展局局長林鄭月娥話，當中有兩幢舊樓要緊急維修，九百幢有失修情況，交由屋宇署跟進。問題係，如果有失修舊樓好似嗰三個車位咁係無主物業，維修責任由邊個孭呢？

叮，本報記者仲發現，政府陷入業權爭拗，原來早有前科，深水埗百祥大廈有十個單位空置咗三十幾年，○三年起收歸政府，但政府一直聲稱同物業嘅債權人交涉緊，七年來冇畀管理費、維修費，直到法團再三提交地政總署張貼嘅「收回管有權公告」，當局先改口話願意承擔維修費。太一叮唔明嘅係，政府自己都唔肯承擔業主責任，點樣以身作則改善危樓問題？

政府懶理無主物業，造成維修費嘅錢銀爭拗仲係小事，萬一搞到物業失修死人冧樓，到時就後悔莫及。好心林鄭月娥做好呢份工，叫地政總署快快趣趣收番無主物業，叫屋宇署真真正正管好舊樓維修，人命關天，冇人想見到土瓜灣冧樓慘劇重演o架，叮！