近排潮流興講香港精神，好多人都講起六、七十年代啲人點捱點苦，尋日建仔嘅立法會議員陳克勤出席一個活動時，都不經意話當年，原來佢六、七歲嘅時候，父母都要外出搵食，佢自細已懂得照顧自己，仲因為孝順，搞出單消防員搶救嘅事件。
克勤仔係議會後生一代，但佢嘅成長經歷都值得好多「80後」同「90後」嘅青年學吓。佢話，當年父母外出後，佢就留喺屋企，某日包租婆將佢同兩個年紀相若嘅男仔一齊留喺屋企，仲用鐵鏈鎖住鐵閘添，小時候嘅克勤出於一片孝心，想煮飯畀父母食，點知搞到成屋都係煙，驚動鄰居報警，仲要搞到消防員同警察都上門添。
呢件事喺今日嚟睇，可能涉及獨留兒童在家，但喺六、七十年代真係好普遍。克勤仔咁細個已經識得體恤父母，真係幾難得，但事後都免不了畀阿媽打餐飽！