特首辦前主任林煥光出任平等機會委員會主席後，好投入新角色，尋日佢出席一個電台節目時，坦承自己嘅作風都有變化。佢話，當一個人有權有勢嘅時候，外面嘅人就好想影響你，明刀明槍行賄、貪污反而仲容易抗拒，相反有時同身邊嘅人太熟、有好感，自己就好容易唔覺意中招，所以佢嘅絕招就係「Cool啲」，即係對人冷漠啲，寧願做Mr. Cool。
林煥光話，公職愈做愈高嘅時候，身邊亦唔經唔覺會出現好多誘惑，所以佢依家學精咗，警覺性好高，寧願對人冷漠啲，都唔想踩界。佢呢番話真係可圈可點，亦可以話係官場心得，不過就好容易令人聯想到佢當年嘅感情事件，尤其係林煥光公然講到「好感、誘惑」呢啲敏感度十足嘅字眼。今次已經係林煥光第二次喺公眾場合自省過去，睇嚟，佢真係從以前嘅陰影中走咗出嚟。
講到依家執掌成日被轟「大花筒」嘅平機會，林煥光話其實平機會內部已經有好詳細嘅規則指引，只係可能有時執行上嚟唔係咁小心，先至會出事。佢又話，自己好慳家，應該唔會有問題，亦會同班同事合作提高工作效率，相信平機會會愈做愈好。