每個年代都有風行一時嘅音樂，「60後」、「70後」同「80後」鍾意嘅嘢未必一樣，不過立法會議員譚偉豪（IT豪）就好潮，同班後生仔女同聲同氣，不但鍾意聽韓國人氣組合東方神起嘅歌，亦都好喜歡迷死一眾港女嘅台灣組合飛輪海。佢鍾意呢啲音樂，某種程度都係想同囝囝溝通得更好。
IT豪尋日出席音樂匯展開幕禮時，話自己鍾意咗囝囝嘅「飛佛」韓國組合東方神起。佢話好佩服東方神起識唱日文歌之餘，又識唱國語歌，提議本港歌星學好日文同韓文，他朝可以衝出香港市場喎。IT豪仲笑言，平時喺立法會太苦悶，得閒聽吓新一代嘅歌都係好事。
另一位立法會議員霍震霆同為人父，但就冇好似IT豪咁同囝囝一齊聽歌，仲講笑咁話自己鍾意嘅係黑人樂隊The Platters，三位公子分分鐘聽都冇聽過添，而佢哋鍾意聽嘅歌，自己都未必認同喎，總之各自各精彩啦！