白鴿黨副主席劉慧卿曾被封立法會十大惡人之一，招牌金句係「離晒大譜」，第七屆兒童議會會議尋日喺立法會大樓舉行，近五十個十一至十七歲嘅兒童議員擔正牌議事，卿姐同佢哋一齊傾，平時慣咗好惡死咁鬧官員嘅卿姐又再發作，大鬧啲小議員事前準備不足同埋照稿讀，當堂嚇窒唔少細蚊仔。
兒童議會尋日辯論立法禁止獨留兒童在家、促請政府協助內地新來港學童同埋及早改善兒童精神健康三項議案，卿姐發言時，一開口就大鬧班兒童議員，炳佢哋唔知係睇漏咗定係冇睇過資料，辯論兒童精神健康竟然冇觸及聯合國《殘疾人權利公約》，仲有發言時又成日睇住份講稿。
卿姐鬧人嘅場面喺立法會不時可見，但啲小議員就可能未見過，又估唔到佢要求咁高，唔少小議員嚇到鼻哥窿都冇肉。好彩陳茂波隨即打圓場，勉勵班小朋友要以卿姐所講嘅為目標，否則怕且班面皮薄嘅小朋友被鬧到喊都似。