「光纖之父」高錕返港同港人分享諾貝爾獎嘅殊榮，約兩個月間出席大大小小場合，尋日高錕夫婦終於結束行程，雙雙飛返美國休息，佢哋臨走前仲透過中文大學向大家講再見，話多謝香港市民嘅熱情款待，希望下次再有機會見面咁話！
一向樂觀嘅高錕夫婦並唔介意返港呢度去嗰度去，總結行程時話今次係既難忘又享受嘅一次旅程，完全感受到香港人對佢哋嘅熱情同支持，好感謝大家都咁關心佢哋。一直致力推動社會關注老人癡呆症嘅高錕太太黃美芸，特別關心香港嘅人口老化問題愈嚟愈嚴重，所以希望大家多啲了解老人癡呆嘅病徵。高錕夫婦要離開香港仲心繫本地長者，難怪香港人咁尊敬佢哋啦。
過去兩個月，高錕嘅人氣熱爆香港，各大機構都捉住佢唔放，除咗科學展覽、參加學校校慶同步行籌款活動外，又為長者中心舉行開幕禮，仲要幫康樂及文化事務署搞嘅高錕小型張郵票設計比賽頒獎，行程真係分分鐘密過教書嗰陣，飛返美國真係要好好休息至得喇。