安老事務委員會主席梁智鴻早排去甘肅探訪山區醫院同參觀當地醫療設備時，整傷隻腳，尋日佢出席自己有份寫嘅新書《同一屋簷下的天使》發布會時，婦女事務委員會主席高靜芝同民政事務局副局長許曉暉即時上前問候，佢好感動咁話：「全港市民都好錫我！」
問起金刀梁點解出事，佢話參觀時要行經一條九曲十三彎嘅山路，唔小心差錯腳，扭親右邊大腿條筋，其實好小事，食咗兩、三日止痛藥已經好番，仲話平時少行山，行路搭地鐵就多。雖然扭親嗰陣少少痛，但見到當地村民咁熱情，開心到乜痛都唔記得晒。
講番本新書內容，金刀梁自爆出身醫療世家，一代名醫梁財信就係佢祖先，試過用鴨腳幫隻雞駁腳。愛滋病基金會下禮拜有個慈善晚宴，當中會有個「扮梁智鴻比賽」，獎品係金刀梁親自操刀做外科手術一次。問許曉暉有冇興趣參加，佢知道係咁嘅獎品，即刻耍手擰頭話：「免費都唔好搞喇！」