煲呔曾被問到市民置業難時，只係話政府唔會輕易改變房屋政策，唔做發展商嘅策略都唔可以朝令夕改，暗示唔會復建居屋。至於冇殼蝸牛上車無門，佢就話凡事都有個過程，仲用自己為例，話當年租咗幾年樓、儲錢，計起十九年先夠錢買樓，一開始買北角，之後就搬吓搬吓買咗中區物業，證明置業係一個漫長嘅計劃。

煲呔曾做完孤獨推銷員之後，就入咗政府，升官升得快，期間仲住過政府宿舍，即使當年曾經租樓住，都應該有好多公務員享受過嘅租金津貼或類似房津等，加上做高級公務員高薪厚職，儲錢梗係話咁易啦，同一般打工仔嘅苦況根本冇得比。佢用呢種高高在上嘅態度教訓打工仔置業要歎慢板，由佢領導嘅政府點會急市民所急呢﹖

面黑藐嘴講到天公地道

佢尋日又話，自己都係「每日做好多個鐘頭」，暗示打工仔要接納「長期OT」嘅現實；至於成日喺公開場合面黑藐嘴，又鍾意逞口舌之快，煲呔曾就話自己「生出嚟就係咁」，黑面都只不過係真情流露喎，原來冇品都可以講到咁天公地道，真係服咗佢。

最搞笑嘅仲係主持人問有冇咩政策佢認為「唔做好過」，煲呔曾晒命咁話「可能包括做特首呢個決定」，跟住死撐本港嘅深層次矛盾，領導人主要都係關心經濟範疇。佢講到自己做得咁辛苦，知唔知香港人都捱得好辛苦㗎？如果煲呔曾肯辭職嘅話，相信廣大市民都會拍手夾道歡迎佢離開禮賓府！到時佢大把時間，日日做佢鍾意嘅擦鞋都得啦！事關佢話一得閒就攞對鞋擦到「立立令」，呢個係佢減壓嘅方法喎。