小白觀點:腦殘病毒侵襲90後
內地網絡熱傳一條性愛短片，係個十幾歲嘅後生女自拍放上網，據講佢覺得身邊好多朋友都有性經驗，對於自己依然係處覺得好唔自在，竟然出錢請人幫忙破處，仲要拍低呢個咁重要嘅儀式公告天下，難怪網民大讚佢係「最腦殘的九十後」。
咁就當然啦，由於呢個女仔並唔係扒類物體，而且仲生得幾清純添，網民睇過之後無不咬牙切齒，認為收少啲都會幫吓佢手，如今既要破財又要破瓜，的而且確又真係幾腦殘嘅。
不過冇辦法啦，其實佢哋都唔想㗎，我懷疑腦殘可能係一種流行性病毒，喺「90後」少女當中廣泛傳播，一般嘅病徵係嘴巴嘟出、手指呈V字、講嘢呢呢囉囉。
本欄建議，衞生當局應該正視腦殘病毒，盡快研究一種新疫苗，幫全港適齡女生打一針，好過佢哋畀錢搵人打針吖。
Blog:http://sunsiupak.blogspot.com
阿豪觀點:鞭撻喪德言之尚早
內地網絡最近流傳一段名為「九十後非主流賣身求榮」嘅短片，有個自稱今年十六歲嘅小妹妹，竟然話身邊朋友個個都破晒處，擔心自己變老姑婆，於是出錢請人幫佢破處，仲將成個過程放上網添。嘩！乜依家啲後生真係咁開放？
由於神州大地乜嘢都係造假，所以大家唔使咁快畀反應住，應該分析一下，究竟段短片係咪移花接木呢？會唔會係有人畀朋友惡搞呢？
好嘞，就當片段係真，呢位小妹妹話自己十六歲，究竟係唔係真嘅呢？近年內地好多體操選手都畀人踢爆年齡造假，點知今次有冇人報大／報細數㗎！
好嘞，畀你連過兩關，唔好唔記得喎，內地商人「只有諗唔到，並無做唔到」，國產人造處女膜一早已經行銷海外啦……所以呢，大家不妨等多一排，睇吓有冇人出書同上電視大談心路歷程，到時先至大聲疾呼道德淪亡、救救孩子都未遲吖！
Blog:http://lukchiho.blogspot.com
網友觀點
甘仔：真係戥佢嘅父母難過，呢啲唔知係邊個嘅錯呢？
性博士：可能內地缺乏性教育，有關當局要好好研究一下喇！
華安：破處仲要畀錢先至制，睇嚟內地啲男人都好鬼搶手吃香！
賓仔：匪夷所思！莫非內地青少年食得有毒食品多壞咗腦？