據專案小組講，中石化石油氣庫工作程序規定，每次接收石油氣之後，要畀石油氣喺氣缸入邊沉降八粒鐘，再清除缸底嘅雜物同水分，行話叫做「扽缸」，就算供應最緊張嘅時候，起碼都要沉降四粒鐘。不過調查發現，由十二月十日至一月三日，中石化有八次冇按工作程序扽缸，沉降時間都唔夠四個鐘。咦，咪啱啱係大批的士死火嘅時間，兩件事有冇關係呀？機電署就話，扽缸時間不足有機會影響石油氣品質，但又話冇證據確定會直接引起死火。都唔知佢噏乜。叮！

機電署仲話喎，石油氣的士引入本港近十年，部分行車里數達八、九十萬公里，甚至百幾萬公里，機件故障係可以預期嘅。大佬，邊個唔知阿媽係女人呀！但佢哋又話，冇證據證明機件故障同死火有直接關係。呢樣又冇證據，嗰樣又冇證據，咁使乜你哋調查呀？

打個比方，的士司機不嬲將架車當做自己嘅仔女，如果個細路病到七彩，帶去睇醫生，醫生係咁意睇吓就亂噏一通，又始終講唔出係乜嘢病，你話啲家長急唔急？唔怪之得業界人士狂炳機電署官僚、失職，話唔會接受呢份報告啦。

叮，機電署又係太離譜嘅，佢哋好似唔知自己做緊乜嘢咁。嗱，本港的士喺十二月十日至一月三日期間大規模死火，但係機電署一月七日先至去攞石油氣樣本化驗，根本無法判斷事發期間嘅石油氣品質有冇問題，唔怪之得乜嘢都話「冇證據」啦。

仲有呀，政府對本港出售嘅石油氣品質從來都唔監唔管，話之你乾唔乾淨啦，依家爆出咁大鑊，先至賊過興兵，又提改善建議，又話要保留二十四小時熱線，但係風頭一過，咪又係當冇事！

最搞笑嘅係，機電署署長陳鴻祥吹水唔抹嘴，話經過今次事件之後，署方已加強監察石油氣品質，所有化驗結果都顯示，石油氣品質適合石油氣車輛使用。之但係，有車房負責人踢爆，家陣每日都有廿幾架石油氣的士死火，需要清洗同埋更換零件，先至可以順利行車，直情狠狠摑咗署長大人一巴掌。

一句講晒，成件事都未解決，的士司機仲有壓力。話時話，呢家嘢唔講得笑㗎，如果架車喺高速公路行行吓跪低，後面嘅車煞唔住掣衝埋嚟，就大吉利是咯。所以呢，太一叮奉勸各位司機大佬，生命冇take two，政府係靠唔住嘅，大家仲係自求多福啦！