煲呔曾政府成日被批諮詢不足，唔願意聆聽外間意見，佢哋對青年人嘅態度好強硬，估唔到對商界要求溝通都死牛一邊頸。中華廠商聯合會轉莊後，前會長尹德勝尋日同傳媒講開以前做會長時同政府官員交手嘅勞氣事，佢批評煲呔曾冇主動約晤四大商會交流，仲數埋佢嘅下屬添。唔通煲呔曾嘅作風感染埋其他官員？
煲呔曾玩自閉、溝通親疏有別係人都知，但尹德勝話，商務及經濟發展局局長劉吳惠蘭（Rita）都好難接觸，佢當年想約新上任局長嘅Rita食飯交流，對方話唔得閒，拒絕邀約，約咗幾次終於就到時間，但Rita就好公式化咁叫人問定會傾乜議題，好古怪。
廠商會方面事後話唔係好同意尹德勝嘅觀感，該會發言人表示，政府官員其實好畀面出席廠商會活動，好似上月初新一屆會董就職禮，煲呔曾同Rita都有去，工展會煲呔曾都有嚟主禮，Rita上個月亦有同新會長食飯交流，商務及經濟發展局發言人就話，局方向來同商界保持緊密合作，相信一切只係尹德勝自己嘅誤會喎。件事到底誰是誰非呢？但點都好，煲呔曾政府要少啲自閉、多啲主動至得！