17/03/2010

政情:港大五任校長慶百周年奠基

港大尋日舉行百周年校園奠基典禮暨慶祝本部大樓奠基一百周年,五位現任同前任校長徐立之、黃麗松、王賡武、鄭耀宗、戴義安齊齊亮相,仲有當年力撐港大建校嘅波斯裔印度商人麼地爵士曾孫、微生物學專家麼地教授(Christopher Mody),城中富豪同名人舊生更係濟濟一堂。

港大歷任校長中,以現年九十歲嘅黃麗松最老資歷,佢三八年已經入港大。佢憶述當年港大好簡陋,只係後山一塊爛地,諗唔到發展到今日嘅規模,期望港大向世界第一邁進。恒基地產主席李兆基(四叔)○三年捐錢畀港大起宿舍,○七年再捐五億元畀港大,一半用作獎學金,另一半支持港大校園建設,呢筆亦係四叔捐畀海內外大學中最大嘅一筆,尋日聯同大女佩雯及孫女、囝囝家傑及家誠、得力助手林高演等人到場。

其他嘉賓仲有新世界集團主席鄭裕彤、英皇集團主席楊受成夫婦、恒生銀行副董事長兼行政總裁梁高美懿、馬會主席陳祖澤等。恒生一姐梁太七五年社科院畢業,憶述當年校內趣事,佢話:「去荷花池拍拖唔係講緊去過幾多次,而係同過幾多個對象去先至最威水!」