華人置業集團第三代嘅劉鳴煒，雖然係大企業高層，但一向崇尚平民生活，最近佢同香港青聯主席陳仲尼以及立法會議員梁君彥囝囝梁宏正，一齊搞咗個「香港精神大使計劃」，希望從不同年齡、不同層面、不同界別選出香港精神大使，推動值得大家珍惜嘅香港精神。乜嘢先係香港精神？邊啲人先做得香港精神大使？三位發起人都大賣關子，今日先會講。
劉鳴煒有對龍鳳胎，雖然得到萬千寵愛，但佢唔主張一對仔女白白承受爺父輩嘅福蔭。小寶貝依家得歲幾，但已經識得手指指揀父母抱自己，搞到身為「80後」嘅劉鳴煒擔心仔女遲啲喺其他方面一樣手指指，以為咁就唾手可得想要嘅嘢，所以佢同太太正努力學習拒絕BB嘅要求，似乎係想透過對仔女實施逆境教育，灌輸正確態度。
本身係博士生嘅劉鳴煒未夠二十歲就考到律師牌，雖然係富家子弟，但佢啱啱由外國返香港嗰幾年，周不時畀人撞到佢坐地鐵返工；到太太生仔，又走去同普羅巿民一樣去公立醫院分娩，絕對係落入凡塵嘅富豪二代。上禮拜佢同太太孖住去睇《歲月神偷》，睇住一個家庭點樣面對逆境，完場後佢仲忍唔住喊咗十五分鐘，真係性情中人。