傳統盆菜宴創下健力士紀錄！鄉議局舊年喺元朗大球場舉行二萬人盆菜宴，慶祝主席劉皇發加入行政會議，當日為咗締造紀錄，鄉議局專登請咗大學嘅人嚟見證同點算人數，以申請列入健力士紀錄大全。日前，「健力士世界紀錄」官方機構終於向鄉議局發出證書，證明佢哋創出一萬四千四百五十九人喺同一時間食盆菜嘅世界紀錄，真係喜上加喜！
講番當日盆菜宴，據講有啲鄉親未等大會發號施令，就匆匆起筷，跟住好快鬆人，令點算人數增添難度，好彩都冇影響呢個大計。尋日鄉議局執委會開會，為咗慶祝盆菜宴打入健力士世界紀錄，佢哋特別暫停會議幾分鐘，齊齊開香檳慶祝，發叔開心到滿場飛同一眾鄉紳飲杯，仲計劃搞多次慶祝會或刊登廣告，將呢件天大喜事向外公布。
講開喜慶事，鄉議局位於沙田石門嘅新大樓興建進度理想，局方計劃稍後舉行一項「上樑」平頂儀式，向外界交代工程規模之外，亦想藉此發動第二輪籌款工程。