港片《歲月神偷》揚威柏林影展，上個禮拜套戲公映，好多人都慕名入場，年長嘅重溫吓六十年代嘅艱難歲月，年輕嘅就睇吓上一代港人點樣艱苦求存，令緬懷歲月嘅潮流又升溫。尋日市區重建局忽然宣布唔拆片中取景地上環永利街，原汁原味保留呢個地方。
市建局主席張震遠冇耐前仲表示唔會改變重建計劃，事隔一個禮拜就轉口風，唔通受咗政府壓力﹖張震遠尋日主持記者會時，話佢哋冇受到任何政治壓力，至於呢個決定同電影有冇關係，佢就好妙咁答：「我冇睇過《歲月神偷》套戲，因為香港嘅戲飛太貴嘞！」
堂堂上市公司負責人冇睇套戲，原因唔係因為冇時間，或者唔鍾意呢類劇情嘅戲，而係因為「戲飛貴」﹖個原因真係講出嚟都冇人信啦，或者張震遠係唔想畀《歲月神偷》偷咗個心啩！