樓價狂飆，特區政府處處捱鬧，日前宣布一次過推售四千個居屋同夾屋貨尾單位，趕及應付今日立法會有議員提出活化二手居屋嘅議題。不過，身為房協主席嘅楊家聲尋日就有異議，以個人身份質疑政策嘅成效，因為夾屋同居屋都係限定申請人入息嘅樓宇單位，呢批購買者本身都未必會買私樓；亦有房委會成員對政府一次過出售居屋有保留。睇嚟政府病急亂投醫，搞到兩個房屋機構都有微言。
房協嘅官方策略係配合政府嘅政策，但楊家聲本人就未必咁睇，尋日佢先同大家計吓數，話夾屋家吓有七百幾個貨尾單位分兩批發售，即使加埋四千個居屋單位，數量都唔夠應付目前嘅需求。而且，夾屋單身申請人嘅月入唔可以超過一萬九千五百蚊，家庭總月入則要介乎二萬三千蚊至三萬九千蚊，呢個收入群嘅人本身都未必會買私樓啦。
除此之外，都有房委會委員唔滿意政府公布措施時嘅言論，如一邊話「建議房委會出售居屋」，介紹措施時卻實牙實齒，連細節點樣做都講埋，佢哋覺得政府當咗房委會委員係橡皮圖章咁，一定要跟住做，唔慶就假啦！