議員爭論最激烈嘅係幾時出發，白鴿黨副主席劉慧卿話希望等到五月十六號，即五區補選結束後，到時六十個議員齊齊整整北上，冇講出口嘅係希望長毛梁國雄、黃毓民等五個人補選返嚟後一齊去。建制派梗係唔同意啦，人人統一口徑兼理由多多，堅持要喺五月一號前抵達上海睇世博開幕。經濟動力梁君彥嘅理據好精彩，話上海六、七月又熱又多雨，去唔過喎！講完仲反問祖籍上海嘅委員會主席方剛意見添。喂，依家立法會去考察，唔係去度假喎！

建制派寧願坐飛機

跟住又拗坐唔坐高鐵，「旅遊超人」謝偉俊同黃定光建議由廣州坐高鐵上武漢、再轉機去上海，不過梁君彥嫌咁樣要成十二、三粒鐘，舟車勞頓，不如一架飛機直航搞掂佢啦，仲話七、八月深圳高鐵站開通再體驗都得啫！連建制派都唔支持坐高鐵，咁佢哋喺財委會通過高鐵撥款係咪有啲諷刺呢？

班議員七嘴八舌拗咗近一粒鐘，最後敲定四月三十號禮拜五出發，之後個禮拜二返港，趕得切翌日開禮拜三大會。至於其他行程細節，例如應該坐高鐵定直航飛機上武漢，又或者喺武漢上唔上武當山吸靈氣咁，一切留待後日內會定奪。拗咗咁耐都係得個吉！好心議員唔好喺議事廳拗埋啲咁細眉細眼嘅嘢浪費公帑啦！