小白觀點：應在包裝加嚇人圖像

消委會測試市面上各種即食麵，發現好多鈉含量以及總脂肪都奇高，食得多好易有高血壓或者其他心臟病，消委會建議市民食即食麵盡量用少啲調味湯包同埋唔好飲埋啲湯喎。唔好玩啦，食即食麵唔飲湯，不如唔好食！

記得細個時有個流傳甚廣嘅都市傳聞，話唔知邊個同學阿哥個家姐個阿媽嘅朋友嘅外甥嘅舅父，有日食完即食麵飲埋啖湯之後，當堂兩腳一伸。之後法醫劏開個肚一睇，嘩，成個肚都係蠟喎，聽到都毛管戙。不過嗰個年代物資匱乏，小朋友理鬼得有鈉定有蠟，成包味精倒落個麵袋，煮都唔煮就搣嚟食，食完仲要撕開個袋舐乾淨添，邊驚得咁多吖。

不過講開又講，如果食即食麵仲危險過食煙，就算唔禁，都好應該喺包裝上印個警告標語，再加埋個壞死心臟或者成肚蠟嘅圖像嚇吓人都好吖！

Email：sunsiupak@gmail.com

Blog：http://sunsiupak.blogspot.com

阿豪觀點：食內地出品冇咁傷身

消委會測試市面四十八款即食麵，發現大部分嘅鈉含量同總脂肪都偏高，可能導致高血壓同其他心臟病，其中有啲更超過每日攝取量標準一半。消委會建議市民，小心選擇即食麵，要留意營養標籤，盡量少用調味湯包同唔好飲湯。嘩，成個即食麵嘅精華，就係在於個湯包同啲湯，要避開晒，咁仲有咩癮呀？

小白兄講嗰個都市傳聞豪伯就未聽過，但係身邊好多人煮即食麵嘅時候都會如臨大敵，又話要過冷河又話要用唔知咩水嚟煮。我成日都諗，食得即食麵就唔慌健康得去邊啦，呢嗱，依家消委會又話啲湯料有問題嘞，咁係咪要清燉老雞湯半日，然之後淋落個麵度食呢？

不過想食即食麵食得健康啲，都唔係冇辦法嘅，可以試吓內地出品，以佢哋成日用假嘢同偷工減料嘅往績，話唔定啲湯料都冇咁有害。

Email：lukchiho75@hotmail.com

Blog：http://lukchiho.blogspot.com

網友觀點……

龍陽哥：乜嘢食得多都有害！不如測試吓邊隻牌子好味啲好過啦。

華安：罔顧人健康嘅鈉麵生產商，同內地黑心商人簡直臭味相投！

勤仔：食即食麵唔飲湯？不如叫人食煙唔點火！

周仔：點解唔研究埋用乜水煮會好啲？依家啲水都唔知有冇污染！