王女士舊年十二月起大便出血，上個月接受大腸鏡檢查，診斷為第一期直腸癌，被轉介去屯門醫院切除腫瘤。據家屬講，醫生喺手術前話成功率好高，病人好快就可以康復，但就冇解釋過會出現併發症嘅機會。

王女士本月三日接受手術，家人兩日後接到醫院通知，話佢喺洗手間跌倒。院方後來又話佢喺病床邊跌倒，家人懷疑醫院有隱瞞。王女士經過急救之後，腹部腫脹，懷疑因為出血所致，送入手術室搶救無效死亡。

明明手術前已經做過詳細檢查，醫生仲話成功率好高添。但院方就解釋話，王女士可能係大腦或心臟有問題導致併發症而不治身亡。到底死因係乜，講得不盡不實，家屬質疑醫院試圖推卸責任。

叮！呢單已經係屯門醫院三月份第二單醫療死亡事故。上個禮拜有位馬女士因為嘔吐及腹痛送入急症室，雖然劇痛難忍，但醫生淨係安排佢輪候照X光。病人等咗兩粒幾鐘，翻晒白眼至被推入急症室，卒之都救唔番。

仲有呀，二月底有位女童因發燒及呼吸困難送入聯合醫院，初步診斷係嘶哮症，入住隔離病房，但燒未退就被要求出院。女童離院一個鐘左右又出現呼吸困難，再度送院搶救不治。

公立醫院接二連三爆發病人死亡嘅醫療事故，醫管局行政總裁蘇利民要盡快向市民交代，如果係制度出咗問題，就應該立即堵塞漏洞；若然涉及資源不足，更加唔能夠再拖。人命關天，唔係講笑。

病人互助組織負責人話，微創手術雖然創傷較小，但技術要求高。家陣公立醫院資深醫生流失嚴重，走完一個又一個，買少見少。年輕醫生對於呢啲需要時間「浸」出嚟嘅技術可能經驗不足，容易出事，受害嘅始終係病人。

叮！正所謂巧婦難為無米炊，公立醫院久唔久就爆鑊杰撻撻嘅嘢出嚟獻世，依家仲愈爆愈密添。呢次事故好可能又係資源不足惹嘅禍。齋噏醫唔到肚，如果唔增撥資源，公共醫療系統遲早玩完！

叮佢個鎯鎯！公立醫院問題多多，根源係醫管局本身管理混亂不堪，資源錯配嚴重，前線人手愈來愈緊張，醫護人員疲於奔命。仲有呀，每次爆大鑊，高層只識搵前線員工「祭旗」，從來唔去追究管理層嘅監管責任。士氣愈來愈低落，醫療事故有乜辦法唔層出不窮吖！