港區全國人大舊年開完會坐飛機返港，飛機降落時畀怪風吹離原定降落跑道，搞到要臨時急升，好彩最後有驚無險。雖然今年佢哋冇再經歷九霄驚魂，但又有阻滯喎，搞到要滯留北京機場。
三十幾名港區全國人大代表原定乘搭尋日晏晝三點半嘅飛機返港，點知撞正大風雪，焗住改搭五點四十分班機。人大方面好識做，喺北京機場安排咗一間VIP房，安頓呢班尊貴嘅人大代表。聽講呢間VIP房有梳化、電視同獨立廁所，仲有無限量雜誌、茶水同點心供應添，不過如果要「柯打」特別嘅飲品，各位貴賓就要自掏腰包嘞。
有人大代表瞄過張價目表，發現呢間VIP房一個鐘嘅租金要三千八百蚊人民幣，班機準時喺五點幾起飛，佢哋喺入面hea咗兩個鐘，差唔多要八千蚊人民幣。跟大隊嘅蔡素玉話，一班人大都對間房嘅設備相當滿意，完全冇怨言。