15/03/2010

播放本新聞相關短片

政情:曾德成褪軚:港難搞亞運

早前嘅東亞運動會,雖然港隊成績唔錯,但硬件同配套上經常錯漏百出,例如唔畀觀眾即場買飛睇比賽,射箭項目更加因為比賽場館起唔成而要縮減大部分賽事。雖然問題多多,本身應該政治問責嘅民政事務局局長曾德成就好似當睇唔到,一味話東亞運搞得非常成功,仲開始將目光轉向十年後嘅亞運會,又指已經吸取籌備東亞運嘅經驗,相信香港絕對有能力搞亞運,加上預計啟德綜合運動中心會喺一七至一八年落成,佢信心爆棚咁認為到時就連場地嘅問題都冇,好似亞運已經水到渠成。

之不過,佢尋日喺自己嘅專欄撰文,態度就出現一百八十度轉變,首先佢大數搞亞運會嘅三大困難,一嚟申辦嘅競爭好激烈,而香港又未必掌握到咁大規模嘅運動會,加上調撥資源搞大型活動其實好困難。

雖然辦亞運係「大事、好事」,但同時都係「難事」,所以係要「實事求是」,先做評估再決定,唔可以輕率決定係咪申辦,口氣同之前相差十萬八千里,睇嚟佢都係有頭威冇尾陣。

佢忽然將個難字放到無限大,強烈暗示唔搞亞運,到底係開竅諗通要再評估,定係間接承認咗佢之前過度樂觀,先至連最基本嘅問題都睇唔到呢?