身兼新界鄉議局副主席嘅離島區議會主席林偉強，早前爆出懷疑侵吞坪洲鄉事委員會近十萬元租金津貼嘅醜聞後，除咗喺月頭開咗個記者會澄清外，從此銷聲匿迹。雖然佢喺記者會度聲稱，會主動聯絡鄉議局主席劉皇發，解釋番件事嘅來龍去脈，但據悉發叔到前日都仲未有佢嘅消息。
咁尋日西貢蠔涌車公古廟嘅重修開光儀式，原本林偉強會以主禮嘉賓身份出席㗎，但儀式喺早上十一點開始，進行到一半，仍然只係見到佢個名牌擺喺度，唔見佢現身。儀式嘅負責人終於忍唔住打電話畀佢，想問吓佢嘅下落，但係佢冇覆機。
竟然臨時甩底，我哋下晝再嘗試聯絡佢，發現佢連手提電話都息埋添，連留口訊嘅機會都冇，睇嚟佢唔單止潛水，仲係疊埋心水玩失蹤嗰隻嘞。
查實林偉強依家遇上麻煩，想匿埋喺屋企唔見人，都係可以理解嘅，但堂堂一個鄉議局副主席兼離島區議會主席，咁樣好似小學生咁玩失蹤，就未免太唔負責任嘞，仲好唔畀面主人家啫。下次佢若果唔到，乾脆早啲同主人家單聲啦！