雖然尋日潮濕兼大霧，但參與中大舉辦「與高錕教授同行」步行籌款活動嘅人士，仍然行得好自在，好似東方錶行主席楊明標同太太拍拖同行，雖然標叔已經七十幾歲，但行兩條大斜路都面不改容，仲可以談笑風生，真係厲害！
標叔健步如飛，好多後生仔都被佢拋離。原來佢幾十年嚟一直做好多運動，游水、打網球、高爾夫球都難唔倒佢。佢游冬泳已經三十幾年，未試過中斷。十幾年前佢仲參加過渡海游泳比賽添！
同場仲有「電器大王」蒙民偉公子David蒙德揚，佢啱啱參加完渣打馬拉松比賽，以三小時五十八分挑戰全馬成功，今次行三點五公里真係好濕碎啫！David為咗跑全馬仲特登花錢上堂，學吓長跑嘅竅門，好認真㗎！
標叔爆料話David游水好叻，原來佢哋喺同一個泳會，David仲攞過家庭組冠軍添！但David話，佢捉三個仔女去學游水後，自己就少游嘞，因為游唔過佢哋嘛！