15/03/2010

播放本新聞相關短片

政情:四叔82歲生日盼兒孫滿堂

恒基地產主席「四叔」李兆基啱啱獲《福布斯》估佢身家狂飆七百幾億港元,又撞啱佢八十二歲生日,雙喜臨門梗要大事慶祝!尋晚四叔喺麥當奴道大宅惠苑擺十五圍歡度生日,大仔家傑、細仔家誠同埋千億新抱徐子淇都盛裝賀壽,兩位着住公主裝嘅孫女更加係全場焦點。

四叔生日只宴請至親嘅人,例如親屬、老友同埋恒基總經理級以上嘅高層,但全國人大常委范徐麗泰囝囝Andrew范駿華嘅出現頗為意外,原來范太喺北京未能親自到賀,就派Andrew赴會。不過Andrew係百仁基金成員,同擔任基金主席嘅四叔囝囝家傑做善事有共鳴,大家梗係愈嚟愈啱傾嘞!

有份出席壽宴嘅賓客形容四叔精神爽利,心情靚爆,佢嘅生日願望係「身體健康,兒孫滿堂」,又向千億新抱施壓!現場喜氣洋洋,尤其係兩位着住藍白色公主裙嘅孫女可愛活潑,搶晒壽星公爺爺嘅風頭添!