沙田馬場尋日進行Mercedes-Benz香港打吡大賽，城中名人爭入場見證馬圈盛事。馬匹「極品絲綢」爆發驚人潛力奪冠，捧走近九百三十萬元巨額獎金，印度馬主喜上眉梢；股壇名人莊友堅嘅「威利旺旺」跑第二，莎莎國際主席郭少明嘅「締造美麗」就跑第四。
十四匹四歲馬競爭打吡賽寶座，莎莎老闆娘郭羅桂珍悉心打扮陪老公入場，郭老闆更預告贏頭馬就捐出獎金做善事，可惜「締造美麗」跑梗頸四，只得七十五萬二千元獎金，再次同打吡夢擦身而過。
馬場仲有另一位稀客，就係全國政協常委陳永棋，佢喺北京開完「兩會」返港，拖埋太太、千金、女婿同外孫捧愛駒「精密紡」場，可惜「精密紡」入唔到頭四名。棋哥話輸咗好閒，下次再玩過。梗係喇，有六歲男孫Sean同三歲女孫Jane喺身邊，所謂有孫萬事足，唔拉頭馬，好閒啫！