立法會教育事務委員會原訂喺今個月十八日開會跟進呢件事，教育局局長孫明揚可能心知當局如果兩手空空去開會一定被議員質死，所以早前透過電郵要求委員會將呢個議程押後，話當局會去加拿大、英國同澳洲等地推廣文憑試喎！

孫公為咗向議員「交功課」，等月中開會時唔好畀議員鬧得咁甘，所以原訂月初帶團去加拿大推廣文憑試，但據聞佢太太孫小芬有親屬不幸離世，孫公要協助處理喪事，所以教育局秘書長張永明臨危受命代孫公出訪，返嚟之後就公布多倫多大學、約克大學同懷雅遜大學等三所加拿大著名學府都表示認可中學文憑試，都叫有所交代。

下屬周圍推廣班救兵

張永明以為成功為港生攞到加國大學入場券，不過有資深升學專家就話當地大學始終對新考試唔熟悉，第一年難免會手緊啲提高收生要求，結果港生只能升讀當地二、三線大學。

畀人一盆冷水淋埋嚟，教育局又點敢以外訪加國嘅少少成果硬撼班立法會議員吖！孫公要喺月中「交功課」嘅如意算盤打唔響，張永明再喺本月尾連同當局副秘書長陳嘉琪到英國倫敦同曼徹斯特推廣文憑試，包括到訪倫敦大學，下個月仲會去澳洲參加當地大學校長會議，第三次推介文憑試，務求喺下次開會前儲多啲推廣成果。

冇嘢揸喺手，孫公去立法會肯定畀班議員轟到體無完膚，所以喺呢段時間必須儲多啲彈藥，攞多幾個國家支持新文憑試，等外訪完再度期去立法會交代，雙方駁起火嘅時候，佢起碼有啲嘢頂住吓先，唔使一味捱打，即使議員依然覺得局方做得唔夠好，咁至少孫公已經避過一劫，唔使出訪前後都畀議員鬧一鑊，計落已經賺咗。