小白觀點：亂嘥公帑拍得住港台

BBC員工真係有福，周不時有得公費上堂進修，最新嘅課程係教員工用facebook。唔係啩，依家啲打工仔，返工第一件事唔係睇睇全日嘅工作流程，而係開住個facebook，使唔使要教至識得用呀？不過冇計啦，BBC同港台都一擔擔，反正係公帑，唔亂使至係對唔住納稅人喇。香港公僕可以有樣學樣，除咗用醫管局地方開寵物急救班之外，亦都可以教吓高官點樣上網，大致可以分為入門班同進階班。

入門班當然係為好似鄭汝樺呢類電腦白癡而設，等佢明白上facebook唔使開關。至於進階班咯喎，好啱環保署班高官，事實證明佢哋本身已經有一定電腦知識，之不過一日要上十個八個鐘，好明顯係唔知邊度BT到好嘢啦，上堂學識一擊即中下載啱心水四仔，返工少上鹹網一兩個鐘，納稅人畀學費都算除笨有精。

Email：sunsiupak@gmail.com

Blog：http://sunsiupak.blogspot.com

阿豪觀點：員工日日「種菜」啩度Hea

BBC開班教員工用facebook，好似幾好咁，始終依家facebook咁流行，唔識玩嘅話，又真係幾Out。至於話要成五十英鎊一個人，只係學兩日咁大把，到底係咪物有所值呢？最令人難以理解嘅係，依家好多僱主都投訴員工成日喺返工時候玩facebook，搞到冇心機做嘢，唔通BBC想啲員工一日到黑淨係掛住「種菜」而唔做嘢？

不過，水能載舟，亦能覆舟，最重要都係睇吓點運用facebook嘅啫。早前有單新聞，話加拿大有個患抑鬱症嘅女人，本來好地地放緊悠長病假，點知好衰唔衰自己將同朋友劈酒狂歡相上載到facebook，結果畀公司見到，立即被停發津貼。香港有「拍拖必」警員將自己啲煙韌相上載到facebook，結果一樣斷正。

所以話呢，家陣員工攞公司着數呢個問題咁受關注，香港僱主係咪都應該效法BBC，教導員工如何誠實使用facebook？

Email：lukchiho75@hotmail.com

Blog：http://lukchiho.blogspot.com

網友觀點……

賓仔：九成係BBC員工用facebook做啲衰嘢，咪要上堂改造吓囉。

小肥：咁有趣，不如問吓BBC有邊個員工唔識用facebook好過啦！

金毛豬：可能BBC啲員工多數係一把年紀，唔多了解後生仔玩意。

阿呆：鄭汝樺個facebook咁失敗，最需要上堂嘅非呢班高官莫屬！