鄧國斌話，除咗政府部門外，審計署尤其重視公營機構嘅管治。佢將審核呢啲機構比喻做「驗身」，睇吓有冇出現異常狀況，希望可以發揮到預防作用，幫公營機構改善管治，更有效運用資源。

正所謂，病向淺中醫，發現有病而諱疾忌醫，後果不堪設想。嗱，即管睇吓佢份「醫生報告」點寫。鄧國斌發現，公營機構最常見嘅管治問題，係董事局及委員會成員經常開會唔見人，又冇申報利益，佢哋更有個通病，就係對應酬、出外公幹開支同埋高級行政人員嘅福利呢啲「敏感開支」，冇妥善處理。

鄧國斌除咗舉出香港應用科技研究院涉及豪花公帑睇風水、旅發局用公帑幫高層購買超豪醫療保險嘅例子之外，更點名批評平機會主席出外公幹亂Fing錢，入住酒店大使套房。

其實，佢提到嗰幾個例子係人都知，公營機構洗腳唔抹腳，浪費公帑嘅醜聞，冇幾耐就爆一單，大家已見怪不怪。除咗平機會，仲有私隱專員公署、生產力促進局、出口信用保險局一大揸，好話唔好聽，公營機構實際上已經變咗「大花筒」嘅同義詞。

叮！就講番平機會吖，前任主席鄧爾邦正經事冇做過幾件，負面新聞就從來未斷過。除咗出差要住大使套房外，更未經港府批准，用公帑幫自己購買七百萬保額嘅巨額人壽保險。更離譜嘅係，佢最叻「寓旅遊於工作」，成日公費周遊列國，連喺埃及舉行嘅非洲人權會議都唔放過。呢個「離岸主席」唔單止引起公憤，立法會帳目委員會更加對佢「極度遺憾」添。

話時話，對市民來講，點止極度遺憾呀，直頭極度憤慨啦。呢，淨係一個平機會，喺鄧爾邦做主席期間涉及亂用公帑嘅醜聞，十隻手指都數唔晒。如果加埋其他公營機構浪費嘅公帑，都唔知有幾多納稅人嘅血汗錢畀呢班敗家仔倒晒落鹹水海。

鄧國斌話，涉及公帑嘅敏感開支，要以「適度和保守」為原則，但係公營機構使錢嗰陣卻揮霍無度。如果當局唔檢討現行制度，唔加強監管，對濫用公帑嘅機構同官員繼續放軟手腳，斷症唔落藥，就算再驗多幾次身都冇用啦。

叮佢個鎯鎯！好似平機會咁嘅政治花瓶，醜聞不斷，只會添煩添亂，次次「驗身」都過唔到關，早已經病入膏肓，就算醫番都嘥藥費，不如摺埋罷啦！