立法會財委會嘅角色愈嚟愈重要，政府好緊張撥款案過唔過到，反對派亦利用呢個批錢嘅機會留難政府，搞到白鴿黨副主席劉慧卿變咗夾心人，舊年高鐵一役就係一例。卿姐尋日講番高鐵一役，原來佢同運輸及房屋局局長鄭汝樺（Eva）經過呢場戰事先化敵為友。
卿姐透露，佢哋就撥款開完第一次會後，Eva並冇完全相信佢，其後立法會秘書長吳文華（Pauline）詢問過全體議員計劃提出嘅問題數目後，計算出只須開多一日半會就搞掂，Eva懷疑得唔得，建議立法會禮拜五、六、日不停站，開足三日會，但卿姐認為一旦預咗三日時間，班議員即使原本冇咁嘅打算，都一定可以講足三日，所以堅持只加開一日半會。
事實證明卿姐同Pauline嘅方法係啱嘅，結果撥款案順利通過，事後Eva立即上前同卿姐握手道謝，喺之後舉行嘅立法會大會仲送咗一大紮鮮花畀卿姐添，不過卿姐轉過頭就將紮花送咗畀幕後功臣Pauline，借花敬佛。