14/03/2010

播放本新聞相關短片

政情:立會提早圍剿鬍鬚曾

政府遏抑樓市無方,坊間要求復建居屋嘅聲音愈嚟愈大,本來啲立法會議員打算喺下個月十四至十五號辯論新一份預算案時提出,但經濟動力議員「蘇菲」梁劉柔芬會喺禮拜三提個促請政府「增添動力促進社會向上流動」嘅動議辯論,啲議員不約而同提早出手,依家已經有最少八個議員修訂,一於提早三個禮拜圍剿財政司司長鬍鬚曾。

八個議員嘅修訂唔單止關注社會流動,仲對預算案無力遏樓市炒風同扶貧表達不滿,提出動議嘅蘇菲建議七項協助基層市民尤其係青年人上位嘅措施,當中包括活化二手居屋市場同重推首置貸款,協助年輕一代置業。點知另有六個議員要求加埋復建居屋落去,仲有提議放寬公屋上樓資格、重推出售公屋計劃,以及增加「限呎盤」土地供應等。

除咗樓市問題,議員亦要求加強支援貧窮家庭、增加青年人參與各個法定及諮詢組織、重設扶貧委員會、增加大學資助學額、成立青年創業基金等,啲措施好似針對鬍鬚曾嗰份空泛無料嘅預算案咁,睇嚟預算案辯論勢提早登場。