玩具大王蔡志明囝囝蔡加讚（Karson）幫爸爸打理生意，地產、玩具業都要涉獵，農曆新年去拉斯維加斯旅行亦唔敢放鬆，work hard之餘都要play hard。記得舊年蔡生送咗架二千萬嘅林寶堅尼獎勵Karson，辛苦一年之後，Karson日前花自己錢買番架限量版新車，雖然車價只係爸爸送嗰架嘅三成價錢，但用自己血汗錢，點都爽啲！
呢架Lamborghini Murcielago LP670-4 SuperVeloce全球限量350部，賣六百一十萬元左右，Karson買嗰陣香港只返咗百幾部，所以愛車如命嘅佢慳啲使都要買番架。架車最大馬力去到670匹，由靜止加速到100公里只需3.2秒，最高速度仲可以去到時速342公里。
Karson話爸爸嗰架啱收藏，自己買呢架可以落地揸，但佢買咗成個禮拜只係揸過一兩次。佢仲話，架車返屋企嗰日，佢第一時間叫阿媽睇，點知蔡太唔敢坐去兜風，驚個仔揸快車，所以Karson承諾唔會做飛車黨，一定會安全守法。