前商務及經濟發展局局長馬時亨因患上腦血管畸形而辭職，尋日佢應香港腦科基金會出席「腦血管畸形」專題講座，大講自己抗病心得，仲透露過去呢兩年，自己幾乎日日做運動，成功減咗十八磅，仲消滅咗「三高」，包括高血壓、高膽固醇同高三脂甘油酸，佢仲講笑咁話，「肥亨」幾乎改名做「瘦亨」，減肥成功更係佢十年嚟最大成就添！
肥亨憶述，兩年前因為經常咳而入院接受掃描，但因儀器有人用緊，醫生建議佢順手照埋個腦，結果因此意外發現有血管畸形，好彩唔算好危險，醫生建議佢唔使做手術，但係就要減壓減磅減低中風機會，依家佢血管瘤並冇變大迹象。雖然有教會、大學教書、中學董事同上市公司非執行董事等四份工作，但佢話自己一啲壓力都冇，亦唔擔心會影響病情，嚟緊月尾仲會隨福音機構「恩雨之聲」去加拿大做分享。
講到陳志雲被捕，曾經做過《志雲飯局》嘉賓嘅肥亨話，作為朋友覺得好唔開心，希望對方可以積極面對，出咗事後亦有為佢祈禱，但就冇直接聯絡佢，只係透過相熟朋友表達關心。