樓市高溫下，發展局建議加快重建步伐，並由降低舊樓強制拍賣嘅業權門檻開始做起，下禮拜仲打算向立法會提交將強拍門檻由九成降至八成嘅修訂添。政界連日議論紛紛，尋日連醫學會前會長蔡堅都加入陣營，佢致電一個電台節目吐苦水，擔心強拍修訂通過之後，自己住緊嘅太子道物業會畀人強制拍賣，到時分分鐘變冇殼蝸牛都似，所以佢徹底反對降低強拍門檻。
蔡醫生話，佢家吓住喺太子道一個物業，已經喺間屋住咗三十年，呢度本身係太太住開，後來兩個人結婚，順理成章做咗愛巢，所以計起上嚟，間屋屬於佢哋嘅時間前後達四十年咁耐。最近有啲業主想大地產商嚟收購，逼其他人支持一齊賣樓，蔡醫生梗係唔贊成啦，因為佢哋每戶曾經夾咗十幾廿萬維修，依家住得好哋哋又話要賣，真係唔得，所以佢擔心降低強拍業權門檻後，好容易被人得逞！
更令佢擔心嘅係一旦畀人迫遷，佢分分鐘要貼多幾百萬或者一千萬先可以買番間樓，如果仲想住喺太子道就更加難，更何況，層樓住咗咁耐，回憶加感情都係無價，難怪佢決定一於反對到底。