14/03/2010

播放本新聞相關短片

政情:唐唐衝燈80後誓揪逃犯

以「80後」為主嘅青年愈嚟愈關注本港公共事務,特區政府都被迫放低身段,多啲諮詢佢哋嘅意見。不過,早前復辦青年高峰會卻搞出畀人掟鞋、踩場嘅鬧劇,事隔一個禮拜,餘波未了,當日有份抗議嘅「80後」再展開狙擊行動,喺facebook成立群組,聲言當日以署理特首身份出席活動嘅唐英年搭車離開時慌失失衝紅燈,違反交通條例兼知法犯法,佢哋會廣集證據,追緝呢位「衝燈逃犯」喎,睇嚟唐唐有排煩。

當日有份進入高峰會場兼舉牌抗議嘅Ytalk!召集人葉浩意尋日喺facebook開咗個「追緝逃犯—唐英年」嘅群組,呼籲當日在場人士提供資料,包括唐唐衝燈嘅片段同相片,佢炮轟唐唐當日不惜衝燈閃人,做法低劣兼罔顧公眾安全,揚言一旦收集到證據,不排除有進一步行動。

另一位當日衝出馬路瞓街抗議嘅FM101成員黃軒瑋(Anson)表示,當時佢啱啱瞓低,就畀警方抬去對面馬路嘅巴士站,一起身就見到唐唐架車離開,佢好清楚記得當時架車係衝紅燈。Anson話,唐唐嘅做法違反交通法例,好想追捕佢歸案:「佢又唔係好似救護車同警車咁執行緊職務,咁做簡直係違法!」

煲呔曾都做過氣候逃犯

不過,當日「80後」踩場兼瞓街嘅抗議手法都惹嚟唔少爭議,有啲論者話「80後」當日衝出馬路阻車離開,都有份製造混亂,佢哋點睇呢?葉浩意同Anson都唔認同,葉浩意仲話「人民要求同唐英年對話,佢唔肯不特止,仲衝燈走人,個責任應該係佢負!」政府發言人就話,當日係警方幫唐唐開路嘅,並唔存在任何違法衝燈嘅問題。警方發言人都話,當日唐唐座駕係喺警察電單車亮着住警號引領下行車,並冇違法。

雖然係咁,「80後」卻好堅決要緝捕唐唐呢個 「衝燈逃犯」,早前,煲呔曾冇出席哥本哈根嘅氣候高峰會,已經畀人封佢為「氣候逃犯」,家吓唐唐又孭上個逃犯罪名,呢個跛腳鴨政府唔通一味靠逃?