十八無醜婦何苦批盪

潮流興整容，據講有年輕化趨勢，依家連小學生都貪靚，要去整整個樣至返學，你話係唔係世界變吖。前排有個探討中女嘅電視節目，有個中女話自己係美容白老鼠，為咗靚乜都夠膽整落塊面度，三十幾歲人，同邵音音以及黃夏蕙一樣咁靚，真係求仁得仁。

查實整容呢家嘢，韓國不知幾流行，不分男女老少幾乎全民整容，所以最怕睇韓國劇集，劇情婆媽都算，演員個個都整到一個樣，我懷疑係為咗控制成本，所以一人分飾幾角。

小弟日前去打邊爐，幾個長腿韓妹坐喺隔籬枱，有靚女當然要望吓啦，哇！唔睇猶自可，睇佢哋都係二十歲唔夠嘅青春少女，本來十八無醜婦，但將自己搞到好似《恐懼鬥室》入面個木偶咁款，再批上兩吋厚粉，畀麻辣火鍋嘅水氣蒸兩蒸，見住啲粉係咁溶，勁有恐怖蠟像館Feel，嚇到小弟連肥牛魚皮餃都差啲嘔埋出嚟。

五官預製組件有商機

早前港大有個男生為咗滿面暗瘡而自殺，震驚全城。家陣年輕人愈嚟愈注重容貌，整容已經有年輕化趨勢，你話得唔得人驚？

正如有部分網友講，時下啲小朋友認真「早熟」，又援交又吸毒，最近仲搞到整容添，真係使唔使呀？睇嚟，家陣嘅校規都係時候與時並進，以前就話規定校服裙、校服褲要幾長至合規格，又話邊啲髮型唔夠端莊得體，依家應該改一改，例如限制個胸嘅size有幾大、個鼻有幾高等等。而第時同學去考公開試請槍都好方便喎，只要強調自己啱啱整過容，所以個樣變晒，邊個證明到你真偽呢？

其實諗諗吓，如果將來整容成為一種潮流玩意，咁都幾好玩喎，會唔會有雜誌專門介紹今年秋季流行邊種耳同鼻呢？再唔係，推出隨時可以更換嘅五官「預製組件」，等啲人隨時可以更換，都係一種商機喎……

網友觀點……

大口仔：女人整容都係畀女人睇，我相信好少男人會認為整容、隆胸係靚。

小小So：做乜啲年輕人見到MJ個款仲唔識驚？

神父：吸毒、整容年輕化，反映時下年輕人重外表多於道德行為！

c9：好心啦，個樣天生嘅，唔靚整極都唔靚啦！