前晚有個菲律賓旅行團一行二十四人，抵港之後打鑼咁周圍搵，都唔見人接機。團友見唔對路，打電話畀相關嘅旅遊部門同機構，仲報埋警添，點知個個部門耍手擰頭，冇人幫到佢哋，呢班落難遊客喺機場滯留足足六粒鐘，至獲得安排入住賓館。

據講，今次懷疑有菲律賓旅行社涉及欺詐，令旅行團變豬仔團。表面睇確係唔關香港事，但菲律賓團友初來埗到，人生路不熟，諗得出嘅本港政府部門同機構都聯絡過，居然冇一個可以幫到手。

叮！好彩旅遊業界呢次一呼百應，令團友可以繼續行程，唔使一落機就要返轉頭啫。如果唔係，堂堂一個國際都會，由得旅客條條Fing滯留機場，甚至流落街頭，你話幾羞家呢！

旅遊業議會話，同政府有通報機制，唔明白點解收唔到通報；旅發局負責人就話，警方接獲求助後並冇通知旅發局，會研究改善同警方嘅溝通機制。呢嗱，依家都講唔清問題出喺邊度，有機制等於冇機制。如果部門各自為政嘅情況唔改變，再有豬仔團落難，一樣要瞓街㗎咋！唔怪得有立法會議員批評情況唔理想，建議當局設立廿四小時一站式協調機制，方便旅客求助。

叮！協調機制早就應該建立啦。依家旅遊事務署、旅發局同旅遊業議會，性質雷同，但完全冇協調，做嘢就田雞過河各顧各，出咗事更加事不關己各卸各。

○八年中，旺角漢普頓酒店已經爆過豬仔團醜聞啦。執達吏要封舖，旅遊業界毫不知情，過百個旅客畀人趕出街；民政事務總署冇聯絡旅遊業界，就將旅客掟晒去安置露宿者嘅社區中心；政務司司長唐英年仲懶幽默咁用「條條Fing」形容受影響嘅旅客，卒之演變成一齣無人不知嘅鬧劇。

事後，各界要求當局以旅客利益為先，制訂統籌協調機制，第日可以共同處理突發事件。估唔到事到如今，當局根本冇吸取教訓，繼續條條Fing，乜都唔做，結果又搞出個大頭佛。

太一叮諗極都唔明，既然冧咗樹就煞有介事咁設立個「管樹辦」，家陣「旅遊之都」變「劏客之都」、「趕客之都」不特止，今次仲做埋「拒客之都」，唔通真係要等旅遊業呢條經濟支柱冧咗，當局至做嘢？叮！