公社兩黨搞五區總辭話要推動變相「公投」，政府額外虛耗近一點六億元公帑搞補選不特止，跟住仲累街坊，現任立法會同區議會議員喺本月中前需拆走街上嘅宣傳板，讓畀參與補選嘅候選人，唔少建制派議員嘈到拆天，搞到好似菜園村翻版咁。
喺上禮拜五立法會內務委員會會議上，獨立議員葉劉淑儀提出抗議，話要議員拆街板個荷包好傷，要求政府資助，唔少建制派議員都牙痛咁聲。喺壓力底下，政府決定暫時唔使議員拆街板住，等呢個月十九號政制事務委員會討論完再算。
擺明係援兵之計，局長林公公都係想拖住先啫！不過，循規蹈矩嘅葉劉早就請咗人拆街板，粗略計算要科水三萬七千幾蚊，依家政府話暫緩執行，佢大嘆係無妄之災，要求政府最少津貼五成開支。
富貴黨主席劉健儀就決定不遷不拆，佢話呢次五區補選令全港九新界嘅議員都要拆晒啲街板，好唔公道，尤其佢係功能組別議員，冇理由地方選區補選都要佢讓位，提議喺唔好郁動現任議員街板下，另覓位置畀補選參選人。
高鐵收地事件，部分菜園村村民接受賠償，有部分就上街大嗌不遷不拆，跟住仲話要複製菜園村，依家班議員嘅要求，簡直似到十足呀！睇吓林公公到時點拆彈嘞！