本文重點
立法會旅遊界議席本係富貴黨嘅禁臠，○八年畀謝偉俊（Paul）攻陷後，富貴黨諗住兩年後上演武士復仇。同時，脫離富貴黨後另起爐灶成立經濟動力嘅「3L」亦覬覦呢個議席，支持胡兆英拿下富貴黨老巢旅議會，諗住兩年後再下一城爭奪立法會議席。諗唔到今次一個二十四人嘅菲律賓豬仔團事件，觸發三方正式交手。
阿Paul搵恩師幫手
阿Paul前晚率先接觸到豬仔團旅客，但佢冇第一時間通知對口單位旅議會，反而走去搵協助佢當選議員嘅恩師、香港入境團旅行社協會主席侯叔祺，為豬仔團搵到暫時安身之所。跟住阿Paul仲要質對手一拳，爆料話前晚搵過多個部門，但全部都幫唔到手，佢噏咗一堆名，其中兩個就係胡兆英當家嘅旅議會同富貴黨前主席田北俊做主席嘅旅發局。
畀阿Paul襲擊後，胡兆英尋日一早就帶住旅議會總幹事董耀中等一大班人去安撫班豬仔團團友，接手善後工作。同時，旅議會同旅發局澄清，前晚都收唔到求助電話，唔知係咪暗寸阿Paul講大話呢？旅議會同旅發局行動迅速，當然係想疏導班團友嘅情緒，以免事件鬧大，但胡兆英同田少最焦急嘅，梗係盡快化解阿Paul嘅攻擊，喺一場豬仔團戰役中輸少當贏，甚至扭轉劣勢，博嚟緊幾日可以反敗為勝啦。