話晒係個人首個攝影展，朱玲玲由頭撐到尾，獨欠人稱「上海姑爺」嘅老公羅康瑞，原來佢身在北京開兩會，搞到姍姍來遲，遲咗三粒幾鐘先亮相，羅生仲話，太太晚晚匿埋喺房間執相執到兩、三點，冷落咗佢喎！原來羅康瑞早前都有出手競投太太嘅作品，可惜出價唔及人哋高，買唔到太太嘅心水作品。

做奶奶嗰日唔會揸機

朱玲玲尋日大爆人生中有第二位Honey，就係攝影嘞，每幅作品都係佢嘅Sweet Baby。佢獨沽一味鍾意影大自然，特別係花朵，佢話齋影梅花已五年，荷花就影咗十年，蝴蝶都影咗三年。但講到影人，就因為囝囝總係怕煩，老公又冇時間，寧願少影。

為影靚相，佢都好大犧牲，每次孭住四、五支鏡頭同主機出門，返到屋企唔係腰骨痛，就係玉手被三腳架夾瘀，而且Gel甲都唔敢整，事關怕按唔到相機掣喎。

問佢會唔會幫大仔霍啟剛影婚紗相，佢甜笑話啟剛冇咁早結婚：「我唔急於飲新抱茶，呢個係囝囝嘅緣分。」即使他日做奶奶，都唔想揸機，寧願高貴啲坐定定。

今次攝影展除咗睇相外，場內仲有輯錄咗朱玲玲今次展品嘅限量紀念攝影集，收益將資助渣打銀行旗下「看得見的希望」計劃，喺內地推動復明行動，幫助有眼疾嘅人。