11/03/2010

播放本新聞相關短片

政情:陳健波恨生女恨到出晒面

依家時代唔同晒囉,再冇重男輕女呢支歌仔唱,有啲立法會議員恨生女恨到出晒面。

梁美芬「時機到」

育有兩子嘅保險界議員陳健波話,身為爸爸始終都係比較希望有囡囡,一嚟女仔通常都會貼心啲,又會識得嗲爸爸,同囡囡講嘢會開心好多;加上女仔會比較識照顧父母,唔怕老來會冇依靠。不過,佢話生女會有個擔心,就係驚佢嫁錯郎嘞。雖然佢暫時話冇意欲追番個女,但鍾意囡囡鍾意到咁出面,小心兩個囝囝投訴喎!

同樣有兩個囝囝嘅專業會議梁美芬,原來一直都好想生女,佢早前開宗明義話想追番個女,因為終於「時機到」。

梁美芬話生咗兩個囝囝之後,本來都想為屋企添多一個女性成員,但兩個囝囝一直都話唔鍾意,寧願要細佬都唔要細妹,搞到佢好頭痕。到近期兩個囝囝都肯話要妹妹,佢同老公傾完都話不如計劃生番個喎!