最終都要問朋友借錢

以前買樓只需畀一成首期，唔似依家咁要畀成三成，不過要買樓都唔係易事，波波話三十年前自己仲打緊政府工，月入四千蚊已經唔錯，但佢睇中一個五百呎嘅單位，當時售價二十九萬，單靠一份人工供樓真係幾吃力，所以惟有打多份工，喺夜校教書每月多賺二千蚊，點知都係儲唔夠錢畀首期，最終要問朋友借錢先可以買到個蝸居。

波波公開自己嘅經歷無非想勉勵年輕人唔好咁易氣餒，但佢都深切了解到時下年輕人嘅窘局，所以覺得政府要做番啲嘢幫社會上嘅冇殼蝸牛。

佢認為政府應該適量復建居屋，一年推兩千至三千個單位，之後睇市場反應，再調節推出幾多居屋。