之不過，大家唔好忘記有人原本都有可能做咗男女主角㗎！早前盛傳話亞視大股東查懋聲有意出售股權初期，一向有涉足出版娛樂行業嘅立法會議員「IQ博士」黃宜弘同太太梁鳳儀都有意入股亞視，但久而久之就好似冇咗件事咁，到咗呢幾日就更加唔使諗啦！IQ博士兩公婆入股亞視根本唔成事。尋日喺立法會見到IQ博士，即刻捉住佢問點睇亞視股權易手風波，佢就冷笑咗幾聲，然後話：「好似亂亂哋喎！」至於仲有冇興趣入股，佢就哈哈笑咗幾聲，然後反問：「你覺得呢？」

有位喺商界打滾多年嘅前輩話，亞視就好似一個英雄塚，有錢佬入親去都損手爛腳，就算再有錢，咁蝕法真係肉都痛埋，每朝一起身開電視，就好似喺天星碼頭推部百幾二百萬元嘅平治500房車落海。前亞視主席張永霖講過亞視每年要蝕三億，到旺旺集團主席蔡衍明入主後蝕少咗，變為將一部售價較平嘅平治250房車推落海。

王晶度橋拍劇料可救亡

聽完呢番話，可理解IQ博士點解有咁嘅反應，事關佢唔入股就唔使蝕得咁慘，算係執番身彩啦！

呢位商界前輩仲好搞笑咁話，亞視依家真係要靠孖「征（晶）」打救，內地商人王征出錢入股，亦可搵導演王晶幫亞視度橋。其實呢位商界前輩心水好清，事關王晶稱得上係橋王，如果大家睇過晶哥製作嘅《縱橫四海》同執導嘅《情陷夜中環》，就知道水準如何，兩套劇集令亞視收視率一度飆升，搵晶哥度橋可能為亞視殺出一條血路都未定。