小白觀點：煲呔曾應去做山寨王
太平洋有個垃圾島（Island of Rubbish），由膠袋、膠樽同鋁罐等垃圾殘渣組成，聽聞面積認真誇張，足足有一千個香港咁大。
有環保團體覺得篤眼篤鼻，話想去清理一下喎。咪住！小白老弟就覺得呢個島好有存在必要，如果可以嘅話，特區政府應該派水警輪去宣示主權。讀者大人可能會問，嗰度冇石油冇天然資源，霸嚟做乜呢？
大家有所不知，睇煲呔曾依家嘅走勢，相信唔使好耐就會收皮，好歹佢都做過特區阿一，我哋都希望佢之後有第二春嘅。到時將成個島送畀煲呔曾，等佢去嗰度登基做山寨王，仲有三司十二局成班友做臣民，以後唔使再做過街老鼠、縮頭烏龜，做番個名正言順塘水滾塘魚嘅King of Rubbish，肯定勝任有餘啦。
係咪應該用公帑買機票送瘟神走？呢筆錢，我相信香港人唔介意畀嘅。
e-mail：sunsiupak@gmail.com
Blog：http://sunsiupak.blogspot.com
阿豪觀點：發電商機大極有個譜
太平洋有個垃圾島，面積足足有成千個香港咁大。呢個垃圾島係由人類棄置嘅膠袋、膠樽同鋁罐等垃圾組成，累積六十年就成就呢個壯觀場面，問你怕未？
依家啲環保團體話，要去打救個垃圾島，辦法就係去拎啲垃圾返嚟回收，聽聞香港都有環保團體參與呢個拯救行動。
老實講，豪伯認為環保人士冇錯係用心良苦，但能唔能夠收到預期效果，就真係唔係咁樂觀嘞。如果啲垃圾真係咁把炮，可以產生能源嘅話，以今日成日話石油就嚟用盡計，Day One就已經有人利用呢個商機，進行大規模垃圾發電啦，又點使等到今日個垃圾島大過一千個香港至出手呢？
講開垃圾島，原來真係有商機。新加坡有個叫實馬高島嘅旅遊景點，原來都係垃圾堆填出嚟嘅。睇嚟，有錢應該投番個返嚟玩吓，賺錢機會應該比經營弱雞電視台大。
e-mail：lukchiho75@hotmail.com
Blog：http://lukchiho.blogspot.com
網友觀點……
妖 人：美國政府好管閒事，自己門前咁多垃圾點解又唔做吓嘢呀？
李怒眉：只怪人類淨係識得消耗資源，到最後咪自己捉蟲！
Kenneth：聽落真係好得人驚，將來人類可能住喺垃圾堆上食垃圾。
影 迷：將呢個題材拍災難片一定會好精彩。
有料爆：
Cheap Cheap豬仔團變超豪乳豬團，恨死隔籬。
SMS傾埋一份：6016 2496