唔係嚇你o架，呢幾年內地發現嘅黑心食品，好似蘇丹紅鴨蛋、孔雀石綠魚、三聚氰胺奶粉，仲有毒蔬菜、毒雞蛋等等，邊樣冇喺香港出現？仲有呀，禽流感、豬流感等疫症喺內地一爆發，唔使幾耐就傳入香港，事關細菌、病毒係唔知乜嘢叫做一國兩制嘅。話口未完，又有瘟疫兵臨城下嘞，廣東多個縣市近日懷疑爆發口蹄症豬瘟，直接威脅到香港。

口蹄症係一種急性、熱性、高度接觸性傳染病，疫情會快速蔓延。揭西係重災區，當地大部分豬場都有大批豬隻受感染，最嚴重嘅死亡率達九成。豬死得多，冇時間處理，就丟落河涌。縣內好多河涌遍布死豬，已經發臭，仲生晒蟲。

更恐怖嘅係，深圳、東莞、惠州、廣州等地嘅無良奸商，明知爆發疫情，仲向有關地方嘅豬農賤價收購病豬死豬，然後轉售圖利。有啲人仲本末倒置，明講「收死唔收生」。

叮，咁咪即係靠害，奸商咁無良，當地政府點可以袖手旁觀呀？講鬼咩，嗰班官員唔單止唔理，仲實牙實齒話當地根本冇發生疫情。當局封鎖消息，病豬肉咪無王管囉。

咁搞法，香港人有難嘞。每逢假日，大家都會北上消費，唱K沖涼揼骨之後，就要搵地方醫肚，唔好彩啱啱食正「口蹄症豬肉」，咁就大鑊嘞。咪以為留港消費就冇事，本港嘅豬肉多數由內地嘅豬場供應，話就話經過檢疫，但係食環署檢疫人員不嬲信唔過，加上邊境走私活動咁猖獗，話唔埋無良商人早就將病豬死豬肉運咗入本港。

廣東發豬瘟，死咗咁多豬，港府點解好似收唔到風咁嘅？請問食衞局局長周一嶽，唔係矇查查得咁交關吖嘛？

叮佢個鎯鎯！人哋就話唔見棺材唔流眼淚啫，港府高官見棺材都唔識驚，淨係豬流感一役，就死咗好多人，家陣疫情仲未過去o架，如果又多一劑口蹄症，睇你周一嶽點頂。如果唔想爆大鑊，快快趣趣做嘢啦！