小白觀點：宅心仁厚唔會噴大字

後日係「觀音開庫」大日子，簡直係打工仔嘅佳音呀，各大觀音廟勢必人頭湧湧。唔想去同人逼？查實觀音娘娘冇特府班高官咁Out，與時並進有網上借庫理財系統，呢個新Product可以稱為「庫輕鬆」，唔使Fax個人資料，又唔使入息證明，嗱，只要善信到時上網Click兩Click觀音Jpeg圖像，即刻有求必應彈張紅紙出嚟，要借十億八億，完全冇托手月爭！

最重要嘅，就係個個都知觀音財務向來「易借易還」，今年借咗，第二年去還就得，如果真係手緊，又或者特登耍無賴唔還都唔緊要，你知啦，觀音大士宅心仁厚，一心普度眾生，好易話為，絕對唔會有人喺你門口噴大字，等街坊街里都知道「陳乜乜借庫唔還」。

所以本欄建議，咁穩健嘅財務體系，好應該輸出國際，等冰島民眾借嚟還錢都好吖，係咪？

e-mail：sunsiupak@gmail.com

Blog：http://sunsiupak.blogspot.com

阿豪觀點：旺角街頭分行夠就腳

今年觀音開庫，有人搞搞新意思，喺旺角行人專用區開設「分行」，等人可以就腳啲容易借到錢，又有人開設網上借庫服務……不過咁喎，咁冇誠意，觀音係咪真係肯幫手㗎？

年年一到觀音借庫嘅時候，紅磡嘅觀音廟例必逼爆，至於善信們究竟滿唔滿意個批核結果，就真係唔知嘞。講開又講，原來根據習俗，借完庫後，第二年開庫前係要還㗎，善信要準備規定嘅祭品感謝觀音菩薩嘅保佑，至可以借新庫。

咁又係，正所謂「舊債唔清，新債免問」嘛，但其實只要你夠大膽一次過借十億甚至一百億，而對方又真係借畀你，咁你就發達喇，因為你大可以賴帳唔還，個債主仲要擔心你有咩三長兩短，以後唔使還添，可能呢樣就係俗語所講「蝨多了不咬，債多了不愁」嘞。呢，你睇美國對中國呢個大債主氣燄咁勁，就知呢句話有道理啦。

e-mail：lukchiho75@hotmail.com

Blog：http://lukchiho.blogspot.com

網友觀點……

白無常：做乜時代愈進步人反而愈迷信？

等錢使：觀音財務易借易還，最弊就係唔知幾時兌現到呢！

善男子：求觀音顯靈打開財爺個庫，真正打救萬民！

小　　肥：借庫咁easy，還庫咪仲簡單，人人都借咯。

有料爆

向殉職消防英雄致敬！

SMS傾埋一份：6016 2496